今期係治療長期咳嗽的最後一篇。 近來天氣開始轉為乾燥， 明天開始也會轉涼。 不少人氣管已經頂唔順開始出現乾咳嘅情況。 好多人進入秋冬天轉季期間也會變成長期咳嗽。 何解呢？
中醫有所講肺為嬌臟， 係一個容易受到損傷嘅狀況。 而且肺喜潤， 凡事一乾燥肺就會受到損傷。 所以潤肺喺中醫嚟講係一個非常重要嘅概念。 對比現代醫學亦都一樣， 其實肺和整個呼吸系統健康的話都有一層正常嘅黏膜， 又喉嚨氣管直至到肺嘅小泡。 而肺嘅小泡負責肺換氣嘅功能。 呢一些細小泡裏面， 有一浸水黏膜(aveloar fluid)， 正常嘅氧氣吸入和二氧化碳呼出 就係靠呢一水黏膜發揮作用， 呢浸水假如出現問題 肺小泡就會黐埋一齊， 影響呼吸， 形成非常嚴重嘅疾病。 但當然一般中醫所講嘅燥咳， 又未重至於令到肺小泡入面嘅黏膜失去了水分。
中醫講的燥咳主要係講整個呼吸道的水分減少。 水份一減少，外來的空氣或其他刺激物便會很容易刺激氣管形成乾咳。 大家有所不知其實呼吸道呢一 黏膜也有大量的免疫細胞， 和產生粘膜上的IgA抗體。 假如呢一浸黏膜變得薄弱， 呼吸道嘅病毒感染便會有機會乘虛而入。 呢個就係點解秋冬天天氣乾燥， 容易得到傷風感冒等上呼吸道病毒感染。
所以中醫治療呢一類乾咳主要係用潤肺方法。 另外肺燥可以分為寒性和熱性。 好多人以為燥咳一定係熱性其實唔一定。 不過以香港人都是生活食熱氣嘢多又經常唔夠瞓， 的確熱燥咳 較為多見。 治療呢一些肺燥咳， 假如屬於熱性的， 可以多食梨， 又或者用梨和蘋果嚟煲湯。 至於買邊一種梨較好呢， 其實無論天津梨又或者是韓國梨一樣可以的， 因為而家其實唔係咁容易買到 新鮮梨的。 另外多用沙參麥冬南北杏嚟煲湯也可以改善呢一些燥咳。 治療呢一種非常煩擾嘅乾咳戒口非常重要。 我經常同病人講咳未好之前，先戒口花生果仁朱古力， 否則真係好難醫得好哂。
另外有一些人鍾意經常大魚大肉又或者經常自助餐， 可出現食滯咳嗽。 喺中醫嘅角度 腸胃Overloaded, 超出負荷會形成食滯。 食滯了腸胃消化水份不好便會形成痰咳。 呢一類咳嗽嘅病人通常會伴有腸胃不適又或者大便不暢順， 去極都去唔清。 脷苔亦都會見得比較乾和厚。 治療嘅時候一定要消食滯，飲食清淡避免再過量進食。 否則可能形成頑痰。
假如大病之後好多人都會有一兩聲咳嗽。 呢種咳嗽通常咳聲無力 ，咳得唔係好重。 仲要點是講得嘢多先會咳而且講嘢嘅聲越嚟越冇力 。 呢一種肺氣虛咳嗽。 有一些新冠肺炎嘅康復者就是這種咳嗽。 但其實任何嘅大病重病 都會損傷肺氣， 好多人康復以後會覺得氣喘和有幾聲咳理由就係咁。 有些病人另外長期在醫院臥床， 會容易得到肺炎其實有相似之處。 無論如何對於呢種咳嗽氣喘， 睇中醫嘅話一般會用益肺氣 的方法來止咳止喘。 通常吃中藥幾個星期後可以再用食療方法療養。 例如煲五指毛桃加陳皮湯就係其中一種方法。
老人家經常氣喘咳嗽， 再加上忍尿功能較弱的話， 屬於所謂 腎氣咳喘。 中醫認為腎氣係人生嘅根本， 我們平時吸氣能夠落到丹田， 主要係因為腎氣有收納的作用。 老人家腎氣虛弱， 收納氣嘅功能亦都弱。 吸氣吸得唔夠深， 呼吸急促，經常氣喘咳。 呢一種病人經常會有痰卡在氣管當中， 啲痰較稀， 而且多泡沫。 要自療呢一種咳嗽和喘氣， 要補腎氣化痰納氣。 如果一般 食療調養， 最好就是用冬蟲夏草，核桃， 陳皮， 加瘦肉煲湯。 呢個係 很有效果的食療藥膳方法。 但最關鍵嘅係買到優質嘅冬蟲夏草， 其實並不容易， 有機會再講。
三篇講了中醫治療咳嗽， 由此可見咳嗽的確係一個非常複雜嘅疾病。 種類繁多用藥方法也多。 所以正如我第一篇起首就講， 點解古代說 名醫不治咳， 就係咁嘅意思。
Comments