最近分享過感冒或者流感時，中西醫處理一些簡單方法，但其實最困擾嘅，往往係感冒好咗之後，卻換嚟一個長期嘅咳嗽。呢種情況喺醫學上叫做「病毒後咳嗽」（post-viral cough），即係話經歷咗病毒感染之後，上呼吸道甚至下呼吸道可能變得敏感，從而引發持續性嘅咳嗽。相信好多人都有過呢種經驗。
有啲人可能仲會有鼻水倒流，影響到喉嚨，導致低咳；亦有啲人會覺得喉嚨好痕，尤其係接觸到冷空氣、夜晚、講嘢多，甚至食飯或者吸入蒸氣嘅時候，喉嚨同氣管都會痕到難以忍受，咳個不停。有啲人夜晚咳得更加犀利，嚴重影響瞓覺，瞓得唔好又會令身體更難康復。
傳統中醫有句說話：「名醫唔醫咳」，因為咳嗽實在太難醫，甚至會影響醫生嘅名聲。當然，呢句只係中醫界內部嘅笑話，但亦反映咗病毒後咳嗽嘅處理確實唔容易。
如果你面對呢個問題，應該點樣處理呢？喺講方法之前，有幾點需要注意。首先，如果感冒之後咳咗超過兩個星期，建議去照一張胸肺X光片。因為有時感冒可能引發繼發性細菌感染，甚至肺炎，而呢啲情況未必一定會發高燒，反而可能只係持續咳嗽。如果真係有細菌感染，用抗生素治療後，咳嗽通常會好返。所以千祈唔好睇漏咗肺炎呢一個因素
另外，亦有少部分病人可能喺X光片中發現肺部有其他病變，例如玻璃樣陰影，甚至係癌症。所以，如果咳嗽超過兩星期，無論係中藥定西藥都冇效，最好去檢查清楚，排除潛在嘅肺部問題。
有啲人可能會因為感冒後咳嗽而首次出現成人哮喘。呢種情況喺西醫上亦有相關處理方法，例如使用吸入性氣管擴張劑或者吸入性類固醇，按哮喘嘅方式治療，對這一種咳嗽亦有幫助。
如果排除咗以上情況，咳嗽仍然持續，喺中醫角度有啲方法可以試下。首先，中醫強調「戒口」，因為戒口係康復嘅重要一步。咳嗽期間應避免食用生冷食物，例如雪糕、乳酪等奶類製品，亦唔好飲凍飲或者食雪櫃攞出嚟嘅生果。就算係其他生果，都應該擺到室溫先食。中醫認為「飲冷則傷肺」，所以避免寒涼食物對康復非常重要。另一方面亦都要小心啲保持背脊保暖，唔好游水
另一方面較少人知道, 應該避免食用花生、朱古力等乾果, 同埋減少食用味精或者重口味嘢食, 如果唔係個喉嚨氣管可以痕癢得好緊要
畀心機做戒口. 病情已經好了一半. 呢啲戒口一定做到咳嗽好返才可以停止
當戒口做好之後，可以試下簡單嘅食療方法。中醫認為感冒後咳嗽可以分為「風寒咳」同「風熱咳」，而依家天氣較冷，大部分人嘅咳嗽都屬於風寒咳。
風寒咳：可以用紫蘇葉加生薑泡茶，每次用兩克紫蘇葉配幾片生薑，用熱水沖泡。可以加蜜糖調味，有驅風寒同潤肺功效。呢個可以用幾日再,睇睇有冇好轉
另一個較複雜但效果更好嘅方法係煲豬肺湯( 薑汁蜜棗菜乾杏仁豬肺湯)，材料包括：豬肺、杏仁、菜乾、蜜棗同埋薑片。呢個湯水既可以潤肺補氣，又可以止咳。理由係假如長期咳嗽未好, 本身病人一定肺部較弱. 所謂以形補形, 豬肺的確能夠補肺
豬肺有潤肺補肺嘅作用，南北杏可以潤肺止咳，菜乾亦有潤肺嘅效果，同時中和薑嘅燥熱。蜜棗可以潤肺開聲，而薑片或者薑汁則有驅寒嘅作用。將以上材料一齊煲湯，可以達到驅風寒同保肺嘅效果。
燥熱咳：
如果係乾咳、喉嚨痛、感覺有熱氣,反而喉嚨痕並不嚴重，就要用潤肺清熱嘅方法。這種咳嗽係因為感冒後, 食咗好多燥熱嘢引起, 農曆新年期間特別多呢啲嘢食了. 這種情況 可以煲雪梨蘋果湯，或者用川貝燉雪梨，加少許蜜糖食用都幾有效. 製作方法其實都幾簡單：首先準備一個大雪梨同埋4-5粒大粒川貝母。將雪梨洗淨，切走頂部約三分一，將核心挖走做成梨盅。將川貝母輕輕拍碎，放入梨盅內面，可以加入適量蜜糖調味。之後將梨蓋蓋返，放入碗中隔水燉大約一至兩個鐘，直到雪梨變軟就可以食用。可以達到清肺熱, 潤肺, 化痰作用.
最後，如果用晒以上方法，仍然喺一星期內冇好轉，建議搵返醫生檢查，睇下有冇其他治療方案。病毒後咳嗽雖然難搞，但只要耐心處理，配合中西醫結合嘅方法，大部分人都可以逐步康復。希望以上分享可以幫到大家！如果有興趣了解更多，可以翻閱我之前喺Facebook寫過嘅三天關於治咳嗽文章 (應該寫於2022)，當中有更詳細嘅治療建議。
Comments